Արարատ լեռը և Սարյանի երկչոտ ժառանգները. ո՞վ է պատվիրել Սարյանին նկարել Արարատը զինանշանին

Օրեր առաջ ՀՀ ԱԺ նախագահ Ալեն Սիմոնյանը տելեգրամյան իր ալիքում գրել էր այն մասին, որ անհրաժեշտ է քննարկել ՀՀ պետական խորհրդանիշներից ՀՀ զինանշանի փոփոխության հարցը:

Ինչպես հայտնի է, այս մասին տարբեր առիթներով հայտարարել է նաև ՀՀ վարչապետ Նիկոլ Փաշինյանը:

Իշխանական ներկայացուցիչների վարած քաղաքականության արդյունքում զինանշանը փոփոխելու հարցը տարբեր հասարակական, մշակութային, քաղաքական գործիչներ մեկնաբանել են Նիկոլ Փաշինյանի՝ Արարատ լեռան հանդեպ ունեցած հակակրանքի շրջանակում:

Հիշեցնենք, որ հայոց «սուրբ լեռը»՝ իբրև զինանշանի անքակտելի մաս, կիրառվել է դեռ ՀԽՍՀ զինանշանում, որի հեղինակներն են Մարտիրոս Սարյանը և Հակոբ Կոջոյանը:

Ավելի վաղ Ալեքսանդր Թամանյանը և Հակոբ Կոջոյանը Արարատ լեռը պատկերել էին նաև Հայաստանի առաջին հանրապետության զինանշանին՝ զինանշանի հենց կենտրոնում տեղադրելով այն:
Oragir.News-ը փորձեց կապ հաստատել Մարտիրոս Սարյանի հետնորդների հետ՝ պարզելու վերջիններիս վերաբերմունքը թե՛ ՀՀ վարչապետ Նիկոլ Փաշինյանի, թե՛ ՀՀ ԱԺ նախագահ Ալեն Սիմոնյանի, թե՛ ՔՊ-ական մի շարք պատգամավորների կողմից հնչեցված՝ զինանշանը փոփոխելու մտքի շուրջ:

Նկարչի ժառանգները, սակայն, իմանալով հարցազրույցի թեմատիկ բովանդակության մասին, սկզբում երկմտանքով ժամանակ խնդրեցին մտածելու և պատասխանելու համար, իսկ այնուհետ՝ մերժեցին:
Oragir.News-ի հարցին՝ արդյոք չկա՞ նկարչի տուն-թանգարանում որևէ գիտաշխատող, որ ցանկանա մեկնաբանություն տալ, ևս մերժման պատասխան ստացանք:

Ստացվում է, որ թե՛ նկարչի ժառանգները, թե՛ ՀՀ հպարտ քաղաքացիները հաշտ են զինանշանի փոփոխման՝ իշխանության առաջարկի հետ:

Հավելենք նաև, որ տարիներ առաջ նկարչի հետնորդները իրար հերթ չէին տալիս պատմելու, թե ինչպես է Մարտիրոս Սարյանը հերոսաբար նկարել Արարատը:

Հաշվի առնելով նկարչի ժառանգների խուսափողական պատասխանը՝ միտք է առաջանում․ արդյոք երկչոտությունը գալիս է Սարյանի՞ց:

Եթե այո, ապա ո՞վ է Սարյանին հանձնարարել, որ Արարատ լեռը պատկերվի զինանշանին: